7 мая. Открыта школьная Аллея «Бессмертного полка».

Кэлэн иһэр Улуу Кыайыы күнүн көрсө оскуолабыт территориятыгар “Өлбөт-сүппэт полк” акция Аллеята арылынна. Кылаастар оҕолорун таһынан ким баҕалаах - үлэһиттэр, нэһилиэк олохтоохторо кэлэн, Аҕа дойду уоттаах сэриитигэр кыттыыны ылбыт, сэрии толоонугар охтубут, Кыайыы көтөллөөх эргиллибит, тыылга Кыайыыны уһансыбыт ытык дьоммут мөссүөннэрин аҕалан, Акцияҕа кыттыһаргытыгар ыҥырабыт. Баар мэһэйдэртэн тутуллубакка, ытык иэспитин өйдөөн, Улуу Кыайыы күнүн өрөгөйүн үрдэтиэҕиҥ!

Названы обладатели номинаций «Лучший ученик» и «Лучший учитель» 2020-2021 учебного года.

Үгэс быһыытынан, Өрөспүүбүлүкэбит күнүн саамай күүтүүлээх түгэнинэн үөрэх дьылын түмүгүнэн быһаарыллар Сыл Бастыҥнарын иһитиннэрии буолла. Оскуолабыт дириэктэрэ И.М. Петухова үөрүүлээх быһыыга-майгыга “Сыл бастыҥ учуутала” анал ааты Марианна Владимировна Бурцеваҕа, химия учууталыгар, “Сыл бастыҥ үөрэнээччитэ” ааты Маша Пермяковаҕа, 11 кылаас, туттарда. Маны таһынан, Бүтүн Россиятааҕы үөрэнээччилэр олимпиадаларын регионнааҕы финалын призердарын бэлэмнээбит И.Р. Ядрихинская, саха тылын учуутала, А.Д. Сыроватскай, ОБЖ учуутала, С.Г. Петухов, физкультура учуутала, Бочуотунай Грамоталарынан бэлиэтэннилэр. Өрөспүүбүлүкэтээҕи учууталлар хамаандаларын Методическай турнирыгар улууспут чиэһин көмүскээн, 3 миэстэни ылбыт оскуолабыт “Суотту ТЕАМ” хамаандата (И.И. Черкашина, Р.Н. Оконов, С.М. Готовцева, К.М. Егорова) дипломнарын уонна мэтээллэрин тутта.

27 апреля. День Республики.

Муус устар 27 күнүгэр бүттүүн Сахабыт сирэ Өрөспүүбүлүкэбит күнүн бэлиэтиир. Биһиги оскуолабытыгар бу күн уратытык ааста. Сарсыардаттан оҕолордуун, учууталлардыын сахалыы таҥнан-симэнэн кэлэн, үөрэхпитин саҕалаатыбыт. Уруоктарга Сахабыт сирин туһунан ылбаҕай ырыа ылланна, хомоҕой хоһоон ааҕылынна, сэргэх сэһэн кэпсэннэ, төрүт оонньуу оонньонно. Остолобуойбут үлэһиттэрэ барыбытын саха төрүт аһынан – арыылаах алаадьынан, буотарах миининэн, саламаатынан күндүлээн үөртүлэр. Салгыы тирээн турар санитарнай ирдэбиллэри тутуһан, түһүмэхтэринэн кылаастары араартаан, торжественнай линейкалар буоллулар. Национальнай библиотека “Саха сирэ: культура, история, тулалыыр эйгэ” бырайыагынан Өрөспүүбүлүкэ үрдүнэн ыытыллар биир кэлим уруогу педагог-библиотекарь З.Н. Бочкарева иилээн-саҕалаан ыытта. Оҕолор Сахабыт сирин судаарыстыбаннай символларыттан саҕалаан устуоруйатыгар, ккултууратыгар, аныгы экономиткатыгар тиийэ дириҥ ис хоһоонноох матырыйаалы билистилэр. Быйылгы тэрээһин уратытынан өрөспүүбүлүкэбит улуустарын билиһиннэрэр сыаллаах “Киэн туттабын Сахам сиринэн, төрөөбү дойдубунан” кылаас коллективтарын бэриллибит улуустарын сырдатыы көрүүтэ буолла. Ол курдук, 1 кыл.- Ньурба, 2 кыл.- Уус Алдан, 3 кыл.- Таатта, 4 кыл.-Амма, 5 кыл.- Мэҥэ-Хаҥалас, 6 кыл.- Чурапчы, 7 кыл.- Усуйаана, 8 кыл.- Горнай, 9 кыл.- Нам, 10 кыл.- Томпо, 11 кыл.- Бүлүү улуустарын устуоруйаларын, ураты-бэлиэ миэстэлэрин, биллэр-көстөр дьоннорун туһунан кэпсээн, ырыа, хоһоон толорон, үҥкүүлээн, дьүһүйэн көрдөрдүлэр. Өрөспүүбүлүкэбит алаас улуустарыттан төрүттээх оскуолабыт үлэһиттэрэ кылаастарга сыстан, долгуйан төррөбүт дойдуларынан киэн туттан туран кыттыбыттара олус кэрэхсэбиллээх. Үөрүүлээх тэрээһиннэр бары кыттыылаахтара эһиил, 2022 сылга, тапталлаах Сахабыт Өрөспүүбүлүкэтин өрөгөйдөөх 100 сылын үөрэххэ, үлэҕэ дьоһун көрдөрүүлээх, кэккэ ситиһиилээх оскуолабыт саҥа дьиэтигэр уруйдуу көрсөргө баҕалаах тарҕастылар.